ლევან II დადიანი, ოდიშიშ ხენწიფე, 1611-1657, მანუჩარ I დადიანიშ სკუა.
1611-1614 წანეფს ლევან დადიანიშ ბაღანობაშ გურშენ თიშ სამთავროს მართუნდუ' რეგენტ – გიორგი ლიპარტიანი. 1615-ს ლევან დადიანქ იძულებულქ იუ ღალა გეგნუგუკონ ოსმალეთის. 1612-ს დეკავშირ აფხაზეთიშ დო გურიაშ მთავარებს დო დეპირისპირუ' იმერეთიშ მეფე გიორგი III-ს, ნამუდგა დამარცხუ' გოჭოურაჭკუმა მელეთის. უკულიან წანებს ლევან II დადიან ხშირას გითმიანთხუდუ' აფხაზეთიშ სამთავროს. 1625 წანას ტახტიშე გეგნარინუ გურიაშ მთავარ სიმონ დო თიშ ადგილს ქუდარინუ აფხაზეთიშ კათალიკოს მალაქია გურიელ. თეშ უკულ ღურაშა გურიაშ სამთავრო ფაქტიურო თის ომორჩილუდუ'.
1630 წანაშ გოხოლუას ლევან II დადიანქ გაუჯგუშუ' ურთიერთობეფ იმერეთიშ სამეფოწკუმა. 1633 წანას ლევან II-აქ დეკავშირუ საქორთუოშ (ქართლიშ) მეფე როსტომს დო თის ქიმიათხუ მუშ და - მარიამ. ათე ნაბიჯით ლევან II დადიანქ კავშირ ქიგიონწყუ ირანწკუმა, სოვრეშე ფარას არძენდეს. იმერეთიშ მეფექ ეცადუ ხეშეუშალებუდუკო ათე ქორწინებაშა, მარა ბაღდათიწკუმა მელეთის წაგუ დო ტვედ ქეშეოთეს ხეშა. მეფეშ გათავისუფლებაშ მანგიერო ლევან II დადიანქ მიღუ' ცხენწყარს დო რიონს შკას დიხეფ, ქ. ჩხარაშ ვაჭარ-ხელოსანეფ, ნამდგეფ რუხიშა გეგნახორუ', ბრელ ოქრო ვარჩხილ დო ძვირფას ქუალეფ. თეშ უკულ ლევან II დადიანქ ქოცადუ მუშ ხენწიფობაშ თუდო გაუერტიანებუდუკო მთელ დასავლეთ საქორთუო. თიქ ბრელშა დომელეთუ იმერეთ წარმატებით, ხეშა ქაშეჱოთუ მეფე - ალექსანდრე III-შ ჯიმა მამუკა დო სკუა ბაგრატ, მარა იმერეთიშ სამეფო ვადამორჩილებუ დო აფხაზეთიშ სამთავროშ შემოერთებაქ ხოლო ვეშეალებუ. ქორთუ ისტორიკოსებს მიოჩქუნა ნამდა ლევან II დადიანიშ მელეთ დასავლეთ საქორთუოშ გაერთიანებაშო ქიანაშ გაჩანაგებაშ ართ-ართ მიზეზო გინირთუ'. 1636 წ-ს ლევან II დადიანქ ეცადუ ურთიერთობა დაუმყარებუდუკო რუსეთიწკუმა დო ელჩეფ ქიმიაშკვუ' მოსკოვშა. პასუხო 1639-1640 წწ ოდიშიშ სამთავროს სტუმარო ქუმაკათუ ელჩინიშ დო ზახაროვიშ ელჩობაქ. ელჩობას რეალურ შედეგეფ ვამუღალუ'. ლევან II დადიანწკუმა ნიკიფორე ირბახიშ დო კათოლიკე მინიონერეფიშ მუკორჩქინაშ უკულ ითირუ თიშ პოლიტიკა. ლევან II დადიანქ აკრძალუ მონეფიშ გუმოჩამა, კათოლიკობას ქეზიარუ დო ცდილენდუ მუშ სამეფო ურბან VIII-შა ჯღონელ წერილეფს რომიშ პაპაშა დუქვემდებარებუდუკონ.
ლევან II დადიანს ჯგირო არჩქილედ ქიანაშ ევროპულო მონწყუალაშ აუცილებლობა; თინა ოდიშიშა იწვიენდუ' ევროპელ ვაჭარემს დო ხელოსანემს. რუხი გინართინუ ქალაქო დო თექ ფარაშ ოჭკადუ გონწყუ'. ოცადუდ ნამდგა ირანულ აბრეშუმ სამარგალოშე გემშუშკუმალუდუკო ევროპაშა. ლევან II დადიანქ გარემონტუ ბრელ ჯიხა დო სათანჯო, ეკლესიეფ დო მანასტერეფ. კულტურაშ განვითარებას უნწყუნდუ' ხეს. თიშ დროს სამარგალოს არსებენდუ ოქროშ მაჭკადალეფიშ სახელოსნო, სოდგა საქორთუოშ ოსტატეფ მუშენდეს. ლევან II-შ კარს გინიჭარუ' ყილოშტყებამიშ ამდღარდღაშა მოულირ არძაშ უმოს ჟვეშ ხეშნაჭარაქ.
Отредактировано ilia (2008-02-14 14:20:32)